Paesitudine : una risposta da l’altra sponda

A Corsica, à senta dì, saria chjuca. Videndula cusì, ùn pari tantu maiò, hè vera. Tandu, s’ella hè cusì chjucarella, comu hè chì no a cunnuscimu pocu ? Aiò, un’isulella, una piccula muntagna à mezu mari, ùn ci vurrà po cent’anni à ghjiralla tutta, nò ? Sicura chì u nostru u locu, induv’è no semu nati, induv’è no campemu, un pocu u cunnuscimu. D’altrondi, hè quì ch’ella si custruisci a nostra identità corsa, in una parti bella pricisa di l’isula cù a so ghjenti, i so culori, i so nomi, u so parlà… 
Sta difinizioni vali pà tutti i paesi di Corsica, micca solu u nostru chì hè un pizzatellu d’un’isula chì s’omu cumencia à vulella veda tutta, ùn pari più cusì chjuca…
 

Par aprasi à u mondu, sicura chì ci vò à intarissassi à l’altri culturi, à l’altri lingui, à l’altri paesi è à viaghjà, andà à scopralu ‘ssu mondu. Quissa, ùn la pò nigà nimu.
Basta solu à ùn scurdacci chì a Corsica cù i so pievi, i so paesi è i so paisoli tutti quant’elli sò, hè dinò ella un pezzu di stu mondu tamantu.

Tandu, intarissassi à a so isula è à i so paesi chì ni sò l’anima è u cori saria quissa a prima apartura à u mondu, ciò ch’ùn currispondi mancu appena à a visioni stretta ch’elli t’ani sempri certi parsoni d’un’isula è d’una cultura chjusa chì c’impidisciaria d’appartena à stu seculu…
Lascendu da cantu stu disprezzu - di sè stessu - chì pò asista, un fattu ci tocca quantunqua à mintuvallu: a Corsica, for di u nostru locu caru, puru stenduci da sempri, semu una bella mansa à cunnosciala bellu menu cà tanti turisti chì venini apposta è chì t’ani sicuramenti di più tempu pà andà induv’ella li pari è quand’ella li piaci.
Mutivi ci ni pò essa assai, è ci saria ancu un bellu studiu da fà ma spessu, in l’altri lochi di Corsica, ùn ci andemu mai posta chì no ùn ci pinsemu mancu : « Andà à chì fà ? »

Oghji, stu fattu currispondi dinò à una cunnuscenza pocu sviluppata di a cultura corsa in generali chì si pò ancu virificà senza tanti riflissioni scientifichi in calchì ghjocu di cultura generali quandu l’errori o certi volti u silenziu nascini pà u più da i dumandi annant’à a Corsica.
Ùn hè nè una critica nè un prucessu : hè un fattu chì si pudaria spiegà, trà tanti altri raghjoni, da u fattu chì no ci accuntintemu di ciò chì no emu sempri cunnusciutu, vistu è intesu senza circà à veda ciò ch’ellu si faci ancu à pochi passi da ind’è noi.
 

Sò più di dui anni avà ch’e t’aghju a furtuna tamanta di travaglià pà l’associu InSite è di sviluppà in Corsica u dispusitivu « Volontariat Rural  » chì permetti à parechji ghjovani di participà à una mansa di belli prughjetti annant’à a cultura, a storia, l’animazioni, u patrimoniu o a natura in li nostri paesi.
Hè cusì ch’e aghju cunnusciutu tanti parsoni straurdinarii chì voni fà campà i so lochi è chì portani in elli, quant’è i ghjovani chì venini à dà una mani duranti sei mesi, sta paesitudine ch’ellu hà discrittu cusì bè l’amicu Corradino Seddaiu.

Più ni battu paesi corsi è più mi pari di cunnosciala megliu a me isula chì in la so diversità ch’omu scopri pianu pianu, ùn hè chè una.
A me cuntribuzioni à a so difinizioni saria quissa : paesitudine hè dinò sta brama di cunnosciasi megliu da aprasi sireni à u mondu è rigalalli u più bellu di ciò chì no semu.