Ghjuvanghjacumu Albertini: in memoria d'un omu tamantu

L’anni Sittanta in Corsica firmeranu ramintati cumè anni di cambiamenti prufondi, di cuscenza, di sperenze, d’impegni, di lotte è di strazii. A mubilizazione contr'à e fanghe rosse di a Montedison, a mossa di i studienti corsi in cuntinente, a strage d’Aleria, a nàscita di u Fronte... tuttu què messu in mùsica da artisti è gruppi militanti tali Canta u pòpulu corsu...

Incù u mo sguardu ch’ùn pò esse cà ritruspettivu (sò natu in u 1975), mi si pare chì l’insignamentu maiò di st’anni Sittanta sìa da veru a forza di u cullettivu. A cuscenza chjara chì l’ùnicu mezu di scuzzulà u sistema in piazza si truvava indè a cuuperazione è l’urganizazione di tutte l’energìe dispunìbule, puru s’ellu ci vulia à assucià ghjente di tutte e mamme.
Scrivìa u gran Poletti chì “l’ora hè venuta di fà l’unione per a salvezza di a nazione”. Hè vera chì d’unione perfetta ùn ci n’hè mai statu, ma u sensu cumunu è e cunvergenze c’èranu quantunque. Ognitantu, si vidìanu attori sfarenti assai chì si sapìanu ritruvà è move inseme. Ghjè un aspettu forse un pucucciu raru in paese nostru.

Sicura chì certe parsone anu avutu una piazza è un’ influenza particulare. Trà i pulìtichi, si pensa à Edimondu Simeoni, l’omu d’Aleria, ch’hè statu – malgradu tutti i so crìtichi – l’incarnazione di a cuntestazione naziunalista, soprattuttu cù u so verbiu altieru è senza paru. Trà l’intellettuali militanti, si pensa à Farrandu Ettori, Pasquale Marchetti è Carlu Santoni.
Eppoi ci n’hè unu ch’hà un statutu un pocu speziale. Ghjera una parsona putente è ancu umbrosa, ma chì si cunfonde incù l’òpera cullettiva ch’ellu hà lanciatu è urganizatu: l’Università d’estate. Ghjè Ghjuvanghjacumu Albertini, chì per disgrazia s’hè spintu stu 6 di nuvembre.

Quand’omu inizia è cunduce un prugettu cullettivu, di règula spera d’esse ricunnisciutu è ricurdatu cumè u principiu è l’architettu. Ma per quellu chì s’impegna à prò di tutti, a più bella rièscita – ancu s’ella hè ingrata – hè forse d’esse sminticatu, segnu chì l'òpera hà supranatu u so autore.
Ghjuvanghjacumu Albertini era un pocu in quellu casu. Tutti quelli – è sò numarosi – chì l’anu praticatu indè l’anni Sittanta anu ricordi tremendi di a so fede, di u so sennu è di a so capacità di travagliu. Ma quelli chì sò ghjunti dopu?

Ghjuntu à l’Università di Corsica in u 1993, ùn avìu mai intesu parlà di Ghjuvanghjacumu Albertini nanz’à a celebrazione di i trent’anni di a riapartura, vale à dì in u 2011. Avìu qualchì ricordu anzianettu di a lettura di u Mémorial des Corses, chì dedicheghja qualchì pàgina à quella sperienza di l’università d’estate. Eppuru, a cunfessu vulinteri, si trattava di guasi nunda. È in giru à mè, ùn mi si pare ch’ella era sfarente.
Ùn sò cà unipochi d’anni dopu ch’aghju avutu a furtuna di cunnòscelu megliu, stu puntellu, in u quadru di u nostru prugettu Guarda fratellu! Affissu è cuntestazione in Corsica (2016-2017). Incù l’associu U Palazzu naziunale, creatu in u 1972 « pour le développement de la langue corse et la réouverture de l’Université », Ghjiseppu Orsolini, u so cumpagnu più vicinu, è l’associu Radiche d’Ulivieru Jehasse, Ghjuvanghjacumu avìa digià publicatu, in l’82, u libru L’affissu per memoria. Stracunvintu ch’ellu era, dapoi l’anni Sissanta, di a putenza di e fiure, ci hà rigalatu un sustegnu è un aiutu tamantu. È ci hà rigalatu dinò una cunfidenza è un’ amicizia di quelle chì cummòvenu... Ma vultemu à a soia a storia.

A storia di Ghjuvanghjacumu Albertini hè un pocu quella di decine di millaie di Corsi, partuti da casa soia per stantà u so pane. Era cunsiglieru d’educazione in liceu di Clermont-l’Hérault, citadina vicina à Montpellier. È st’esiliu l’aggradìa pocu.
Curscincu ch’ellu era, è cumè unipochi di paisani soii, à Ghjuvanghjacumu li piacìa à impinnà. Una di e puesìe più anziane ch’ellu hà publicatu, indè a raccolta Rinforzu, hè intitulata “Partenza”. Si capisce in freccia ch’ùn si tratta di lamintassi nant’à a so propria sorte, ma di dinunzià un’ inghjustizia patuta da a Corsica sana. Bisogna à vultà in Corsica, u più prestu pussìbule, ma micca perch’ella firmessi in manu à e listesse putenze esterne è ingorde.
Trà i primi pichji di Ghjuvanghjacumu, truvemu dinò u sinemà. S’hà compru prestu una super 8 ch’ellu hà frustatu da per tuttu. Sicondu ellu, u so filmu simpliciamente battizatu Corsica era u primu filmu in lingua corsa; u prisintarà per a prima volta in e Ghjurnate corse di Corti in lu 1972.

Eppuru, si sà chì l’impegnu maiò di Ghjuvanghjacumu Albertini hè statu bellu diversu: l’Università d’estate, urganizata da u 1973 à u 1977. Hè vera chì dapoi a fine di l’anni Cinquanta, i studianti corsi, in Parigi soprattuttu, avìanu rilanciatu a rivendicazione d'un’ università in Corsica. Hè vera dinò chì a lege Faure di u 68 liava l’università à u sviluppu regiunale, ch’elle sò state create tandu decine d’università, è chì a Corsica pudìa sicuramente pratende à a soia, soprattuttu dopu à a creazione di u stabulimentu pùblicu regiunale in u 1972.
À l’iniziu, ùn si trattava ancu di què. A prima manifestazione impurtante urganizata da Ghjuvanghjacumu Albertini hè stata a Matinata corsa di u 26 d’aostu 1970. U sociu essenziale di Ghjuvanghjacumu era tandu Antone Veuvet, Curtinese, bellu più anzianu (natu in lu 1899) è digià impignatu indè a squadra di u Muntese.

Prima hè stata a Matinata corsa in u '70, poi a Ghjurnata corsa di Corti in u '71. Ma in u '72, u cambiamentu hè digià maiò: e Ghjurnate corse di Corti dùranu da u 6 à l’11 d’aostu, incù trè “journées de la culture corse” urganizate da u Centre d’études corses d’Ecchisi, sott’à a rispunsabilità di Farrandu Ettori, prufessore à l’Università di Pruvenza. Benintesu ch'in giru à què, c'èranu sempre tant’altre cose: messa corsa, cuncorsu di puesìe, cuncerti, teatru, assemblea generale di Scola corsa, mostre di pitture, d’etnugrafìa, d’artigianatu, ecc.
Megliu: nanzi à quelle ghjurnate di u '72, s’annunziava digià un passu novu per l’annu à vene: « Ces Journées sont une étape prévisible vers un grand rassemblement de la jeunesse corse dans une véritable “Université d’été de Corte” en août 1973 » (Arritti, n° 56, 25 di lugliu 1972).

In tèrmini d’urganizazione a sfida era tutt’altra. Ghjuvanghjacumu era u capugenerale, ci travagliava tutta l’annata, in cuntinente - Ecchisi, Montpellier, Tulusa, ecc. - cumè in Corsica, ma ùn pudìa almanaccà tuttu da solu. S’hè trovu nun solu incù Farrandu Ettori è a so squadra, ma cù parechje grande parsunalità di a cultura corsa di l’èpica: a squadra di u Muntese incù Ciavatti è Colombani, ma dinò Pasquale Marchetti, Ghjacumantone Martini, ecc. Eppoi c’èranu tant’altri, più o menu anònimi. Frà quessi ùn possu mintuvà cà a so moglia, Annamaria, chì s’hè spinta mancu vinti ghjorni dopu à ellu, è ch’hà accumpagnatu cun fede tutte e so faccende.
Ci vulìa dinò un locu più maiò, chì quì ùn bastava più a scola Sandreschi, è anu dumandatu à pudè utilizà i lucali di u liceu di Corti. U rettore era contru, ma u merre Pierucci hà cunvintu u prifettu, minacciendu d’impristà u Palazzu naziunale, ciò chì pudìa avè un impattu simbòlicu assai forte.

Hè cusì chì, da u 1 à l’11 d’aostu 1973, hè stata urganizata a prima Università d’estate. Infatti l’Università d’estate era a parte universitaria, sempre sott’à a direzzione di Farrandu Ettori, di e “Ghjurnate corse di Corti”. For’di a dumenica, si travagliava tutti i ghjorni, da 9 ore à meziornu, è da 3 ore à 7 ore di dopumeziornu. E matinate èranu cunsacrate à e furmazione è cunferenze: storia, etnulugìa, literatura, drittu, linguìstica, etc. I dopumeziorni principiàvanu cù a furmazione di l’insignanti in lingua corsa, assicurata da l’associu Scola corsa, è cuntinuvàvanu cù è vìsite, nant’à a situ d’Aleria, in Merusaglia, ecc., o i dibàttiti, in giru à l’ecunumìa di a Corsica o e situazione di e lingue minurate.

Hè capita chì l’avenimentu urganizatu da Ghjuvanghjacumu ùn avìa solu un scopu culturale o scentìficu: c’era a perspettiva più generale di cambiamentu è d’emancipazione. Si pò dì a listessa cosa per l’altre attività, dette “para universitaires”. C’èranu cuncerti, mostre, teatru, messa nustrale incù prèdiche è letture in lingua corsa, ecc. C’era dinò stu primu attu, u primu d’aostu, induve tuttu principiò à 7 ore di mane, pisendu a bandera nant’à un pughjale sopr’à Corti, quellu di a Capanna à u Ciocciu. È c’era soprattuttu u dibàttitu di u 4 d’aostu, in giru à l’autunumìa, ch’hà adunitu trà 300 è 400 parsone, sapendu ch’elli èranu tempi di radicalizazione.
Durante l’annu 1972, u Guvernu avìa fattu parechje scelte dannose : ricusu d’auturizà l’insignamentu facultativu di a lingua corsa (invece chì u brittonu o l’uccitanu pudìanu esse insignati dapoi u 1951) ; ricusu di lancià un prucessu di creazione d’un’ università ; ricusu d’impone à u Statu talianu a pruibizione di i svarsamenti chìmichi (fanghe rosse) in mare... Digià di ghjinnaghju 1973, a famosa Chjama di u Castellà marcava l’abbandonu di u regiunalismu di l’anni Sessanta, pruclamendu u drittu di u populu corsu “à esse patrone di a so sorte è di i so loghi”, è lanciendu a custituzione d’un’ “unione di a patria” per strappà l’“autonomia interna”.

Tandu Ghjuvanghjacumu Albertini era militante di l’Action régionaliste corse, è ognunu a sapìa. Stu spìritu indiatu si ritrova in i so puemi, per esempiu indè quellu nant’à e fanghe rosse. A cunclusione hè schjetta: u pòpulu corsu deve esse maestru di a so sorte... è prestu. In u 1973, era ancu à capu di a “cummissione culturale” di l'ARC, ed era unu di i quattru intarvinenti di u cungressu di u Cateraghju, privistu dopu à l’università d’estate, per trattà di i “prublemi culturali”.

L’ARC avìa participatu à e discussione di u Castellà, ma a so delegazione ùn avìa firmatu u ducumentu, argumintendu ch’ellu ci vulìa una validazione di a so assemblea generale. Infatti l’ARC era l’ùnica urganizazione chì pudìa cuntà nant’à centinaie di militanti, è a vera cagione era piuttostu d’ùn esse furzati ad abbraccià un’ iniziativa nata in altrò. Nant’à u fondu, ùn èranu tanti i prublemi. À l’assemblea generale d’Abbazia, u 22 di lugliu 1973, i statuti èranu stati mudificati da accertà chì “le mouvement revendique l’autonomie”, è u nome era statu cambiatu in Azzione per a Rinascita Corsa.
Ciò ch’ellu vulìa Ghjuvanghjacumu, era un grande avenimentu induve stu cambiamentu fussi palisatu davant’à tutti, chì a ghjente si pudessi ritruvà è scumparte u stessu ardore. È s’hè passata cusì. Tutti quelli chì si dicìanu regiunalisti qualchì mese prima, si dicìanu avà autunumisti è parlàvanu di i dritti di u pòpulu corsu. L’urganizatori anu chjamatu què “a nostra notte di u 4 aostu”, in riferenza à a Rivuluzione francese.

Eppuru ùn si trattava mancu in burla d’urganizà un’ università naziunalista. Ghjuvanghjacumu Albertini era un militante indiatu, micca un omu di partitu. D’altronde, ùn s’hè mai prisintatu à un’ elezzione, ancu dopu à u so ritornu in Corsica, in l’82. Si vede ch'ellu hà sempre circatu à adunisce ghjente assai varie, senza pudè sempre accuncià à tutti.
In u ’73, per a prima edizione, ùn hè riisciutu à fà piantà e lite trà Pasquale Marchetti da una parte, è Petru Ciavatti è Ignaziu Colombani da l’altra. Malgradu i so sforzi, quelli artigiani di u Muntese si sò ritirati. Farrandu Ettori era di sicuru nant’à u listessu filu. Trà l’intarvinenti di a prima edizione, parechji ùn avìanu nunda à chì vede incù u naziunalismu: Francis Pomponi, Antone Casanova, Max Caisson, ecc.

Ghjuvanghjacumu facìa cusì, puru sapendu ch’ellu sarìa criticatu. In u ’73, era invitatu Michel Leenhardt, u direttore di u giòvanu parcu regiunale, è certi l’anu vulsutu caccià fora. L’annu dopu, peghju, hà invitatu raprisentanti di l’urganismi chì simbulizàvanu a pulìtica di u Statu, qualificata di culuniale: a SOMIVAC per l’agricultura è a SETCO per u turismu. Per ellu, i scambii sò stati pusitivi, ma i rimpròvari sò stati duri duri.
Ci vulìa à strazià, ma u fattu si stà chì a prima edizione di l’Università d’estate hè statu un successu tremendu. A scrivu cumè Ghjuvanghjacumu a m’hà conta: “a ghjente ùn vulìa parte, dicìa ch’ella era impussìbule di piantà. Eiu aghju rispostu ch’ùn si piantava nunda, ch’era appena iniziata.”

Mentre chì a rivendicazione di l’università criscìa è criscìa in Corsica, incù sta rièscita di l’Università d’estate è a mossa di i studianti corsi di Nizza, a risposta di u Guvernu, di dicembre 1973, era propriu un disastru: si prupunìa solu d’istituisce un primu cìculu di drittu è d’ecunumìa in Aiacciu. Bella sicura ch’ùn hà fattu cà scatinà a mubilizazione è scunvince l’ùltimi puliticanti di a vechja vardia. Di marzu 1974, a cummissione speziale furmata da u cunsigliu generale dumanderà l’apartura d’un università cumpletta, uffrendu tutti i livelli di studiu.
In quellu cuntestu, a siconda edizione di l’Università d’estate era più cà attesa. L’affissu disignatu da Ghjiseppu Sicurani, incù l’arme di a nazione corsa, simbulizava un spìritu ancu più rivendicativu.

Quist’annu 1974, Ghjuvanghjacumu Albertini hà purtatu un’ innuvazione tècnica chì n’avarà suspresu unipochi. Si filmava un pucucciu tutti l’avenimenti di u prugramma, è ogni sera un giurnalettu televisu facìa u riassuntu di a ghjurnata.

Trà i mumenti stòrichi di sta siconda edizione, si cunnosce di sicuru u ghjuramentu fattu davant’à u Palazzu naziunale cù tutti i participanti, Ettori in testa, u 10 d’aostu. Tutti anu ghjuratu d’ùn piantà a mubilizazione fintantu ch’ùn saria aparta un' università in Corti. Pìcculu fattu un pocu stunante: Ghjuvanghjacumu m’hà contu ch`ellu hè ellu ch’avìa prupostu què ma ch’ùn hà ghjuratu, postu chì di modu generale era contr’à i ghjuramenti! Ghjè qualcosa chì l’assumiglia assai bè. Era un omu carcu di valori, di grande parsunalità, ma chì mittìa sempre u cullettivu in priurità.
Trà l’altri mumentoni di u ’74, c’era stata prima a cummemurazione di u bicentinariu di l’impiccati di Niolu. Quist’annu quì, l’Università d’estate hè stata aparta di notte, in giru à un focu chì devìa brusgià simbulicamente e piaghe di Corsica. Ogni parsona era invitata à scrive una di quelle piaghe nant’à un pezzu di carta, nanzi di lampallu indè e fiare.
Duie tappe assai pulìtiche, rivendicative, di sicuru. Assai assai mondu, di categurìe belle diverse. Eppuru... Sicond’à Ghjuvanghjacumu, u focu appassiunatu di u prim’annu, u “spìritu di rinàscita” ùn s’hè ritrovu è ùn si ritruverà mai più. Forse hè quellu u più grande sicretu di l’avenimenti maiò: ghjè ch’ùn si ponu ripruduce.

D’uttrove 1974, un’ inchiesta di a SOFRES palisava chì 92 % di i Corsi èranu favurèvuli à a creazione d'un’ università, è 46% per ch’ella fussi stabilita in Corti (contr’à 32% per Aiacciu è 16% per Bastia). Ghjè tandu chì sta scelta di Corti hè stata validata da u cunsigliu generale. Ghjera una prima vittoria essenziale per i partigiani stòrichi di l’università, è per Ghjuvanghjacumu Albertini benintesu.
Di maghju 1975, s’arrigistrava una nova vittoria: l’inviatu di u Guvernu, Libert Bou, numinava un direttoriu pruvisoriu per l’università, cumpostu di persunalità militante è piuttostu autunumiste, cumè Jean-Pascal Pierre è Farrandu Ettori. Ma u cuntestu s’hè prestu infiaratu, digià per l’Università d’estate. U scagnu pulìticu di u Partitu di u populu corsu per l’autonomia hà dichjaratu chì: “le PPCA retire sa participation officielle à l’Université d’été de Corti, en raison du soutien objectif qu’apportent des organisateurs de cette session à l’opération coloniale Libert Bou; et parce que cette université a cessé d’être l’instrument de lutte qu’elle était à ses débuts” (Populu corsu, n° 5, estate 1975). Per di grazia, quandu i militanti di l'ARC è di u PPCA si sò ritrovi nant'à u corsu Paoli, anu dicisu di marchjà inseme sin'à a merrìa, da accende una fiàccula chì devìa firmà incesa sin'à l'apartura di l'università.

Prestu sò ghjunti u cungressu di l’ARC, l’azzione d’Aleria è i scontri di Bastia, ch’anu cummossu forse ogni Corsu. È tandu, Ghjuvanghjacumu hà avutu una gattiva suspresa: i 21 è 22 d’aostu si trattava di falà in Aleria cù i fucili, ma i ghjorni dopu u dùbbitu era tutale. Ghjunghjìa ancu a ghjente da i paesi in scagnu di l’ARC à l’Aiglon, in Corti, è ùn si sapìa mancu cosa ci vulìa à dilli. U muvimentu era cume stantaratu.
Tandu hè falata un’ altra piulata. U 6 di nuvembre 1975 era firmatu u dicretu creendu l’Università di Corsica, ma nimu pudìa parlà di vittoria, per via di a numinazione à a presidenza di Pasquale Arrighi, anzianu diputatu gullistu è capifila di u putsch d’Aiacciu in u 1958. Insomma si vulìa apre un' università in Corsica sì… ma à l’usu francese, luntanu assai da tutti i travaglii preparatorii di u direttoriu. Farrandu Ettori ricuserà d’esse membru di u cunsigliu numinatu da u Guvernu.

A mossa devìa cuntinuvà, è in u 1976 e “Ghjurnate corse di Corti” diventonu e “Ghjurnate corse di Corsica”. U nome era forse un pocu guffarellu, ma l’intenzione era bella. Prima s’escìa digià da Corti, ma avà ghjera tutta a manifestazione, prugrammata nant’à 16 ghjorni (!!!) chì s’allargava. I participanti sò andati à parlà d’agricultura in Calinzana, di ruralità in Alisgiani, d’archeulugìa in Livia, è l’indiatura pulìtica firmava a listessa. U FLNC era statu creatu di maghju, è u mumentu u più attesu hè statu sicuramente l’assemblea generale di a Cunsulta di a giuventù naziunalista corsa, ch’hà adunitu assai ghjente.
In u 1977, Ghjuvanghjacumu è a so squadra anu circatu à sparte ancu di più, urganizendu e Ghjurnate nant’à sei cumune: Corti, Luri, Calinzana, Cervioni, Bastelica è Sartè. Nant’à l’affissu firmatu da Orsolini, ci si s’hè ancu Zicavu, ma fatta fine a merrìa avìa ricusatu d’accoglie l’avenimentu. Una volta torna, u successu hè statu maiò, ma sarà l’ùltima università d'estate.

Ghjuvanghjacumu m’accerta ch’ùn c’era nissun’ laziu di piantà, chì l’affare ùn hè mai statu in discussione. Ma ghjè stata l’ùltima quantunque, ed hè diffìciule di circà e spiecazioni aldilà di a fatica è di a dillusione rispettu à u prugettu d’università messu in anda da u Guvernu.
Ellu, a m’hà conta cusì: “Ciò ch’hà pussutu cagiunà a fine, forse hè stata a nòmina di Pasquale Arrighi à capu di l’università. Sapìamu quantunque ch’ella era quì st’università – puru di modu virtuale –, ch’ella esistìa digià. È pensu ch’ella era troppu diffìciule per noi di vede st’università creata da u Statu francese, cù un presidente numinatu da u Statu francese, cumè a figliola di l’università d’estate, sapendu ch’ella era quessa chè noi vulìamu tutti”.

Hè stranu chì una sperienza putente tale l'Università d'estate finissi di modu cusì discretu. Ma infatti, ancu quessa currisponde abbastanza bè à a caràttaru di Ghjuvanghjacumu Albertini. Cinqui anni dopu, in u 1982, si ne vultava infine in Corsica, in postu in Aiacciu, ma ùn sarà mai più a figura di l'anni 70. Ellu ùn circava i pruiettori, i mittìa nant'à l'altri.
Li sarìa piaciuta à fà megliu, sicura, è mi parlava à spessu di ciò chì li dulìa, ma li si parìa quantunque d'avè fattu qualcosa di bellu è d'impurtante per u so pòpulu è a so terra. 

Ùn era mancu di quelli stumacati, girendu u spinu à tuttu ciò ch'elli èranu. I so valori èranu firmati i listessi. D'altronde, di ghjugnu m'hà chjamatu per ch'e' pigliessi a so pricura per l'elezzione legislative. Ghjè tandu ch'aghju capitu ch'ellu era indebbulitu assai. Eppuru, ellu ùn l'accittava, mancu per ride. Ognitantu parlava di tutti l'archivii ch'avìa da cantu, di a so sperenza ch'elli pudèssinu ghjuvà à d'altri è à a Corsica sana, ma a discussione si piantava sempre in furia. 
Mi dicu ch'ella hè forse quell'energìa vitale chì l'hà permessu d'urganizà l'avenimenti tamanti ch'èranu l'Università d'estate. Trè ghjorni nanzi di parte à l'altru mondu, mi disse ch'ellu era cuntentu, perchè chì u so mèdicu avìa buscu duie piazze in stabulimentu per un mese, è ch'ellu si puderia ripusà un pocu incù Annamaria prima di vultà in casa soia. Oramai sì, ripòsanu inseme, in un altru locu. Ma di quessa ùn mi ne scurderaghju.