A persona, un mondu da amparà à curà ?

A persona fìsica hè un arnese di primura da misurà un Mondu soiu. Un arnese da piglià cuscenza di l’Esse trà Sè è l’Altru. S’e no circhemu à mezu à e fole una traccia di sta raprisintazione di a persona, fìsica, pudemu vultà à a fiura di u Saviu d’Ascu. A ghjente andava à vede stu saviu in casu d’imbrogliu impussibule à scioglie cù a sola ragiunata individuale. Hè cusì chì une pochi di viaghjadori persi per via di un tempurale s’eranu messi à l’ascosu da siccà si i pedi à listessu focu. Eccu chì à u fà di u ghjornu quelli Niulinchi è Aschesi ùn ritruvonu più i so pedi. Impussibule di spiccà i soi da quelli di l’altri, solu u saviu pudia aiutà à ritruvà li. Hè cusì chì à colpi di tizzone infiaratu u saviu hà toccu ogni pede, è ognunu hà pussutu ritruvà u Soiu.
Ci saria da dumandà s’è u dulore, solu, hè capace à permette una manera di turnà à sè, una forma di ricunniscenza. U male da curà sarà forse propriu “robba” Soia, intesa da rilazione fisica cù i so lochi, i so pari, per via di a so persona.
 

A scenza ci dice chì u dulore hè “una sperienza sensoribile è emuziunale spiacevule”. A sapemu chì in certi casi, u dulore hè un mughju zittu, una manera per u malatu di dì “Sò quì”.
È cusì, ci dumanda di ricunnosce u so male cume s’ella fussi a ricunniscenza di u so Esse. Al dilà di u corpu, quandu à mente hè ferita, u dulore diventa una manera di sprimesi. Si dice chì l’emuzione ch’ùn hè stata detta, sdice è si stampa. Ma u dulore ùn hè a sola manera di sente i cunfini soii. U sensu chi ci permette di sentessine indè u spaziu, di cunnosce è ricunnosce e limite di a nostra persona fisìca ; si chjama propriucezione. Ognunu cunnosce i cinque sensi: u gustu, a vista, l’uditu, l’odoratu è u tattu.
À quelli s’addunisce oghje : u dulore, a termocezione, l’équilìbriu è a propriucezione.
A propriucezione hè veramente interessante postu ch’ella hè un' integrazione di tutti l’altri sensi per dacci una rapresentazione di u mondu è di u nostru corpu. Senza sensi, a rilazione trà u corpu umanu è i so lochi ùn serìa micca pussibile. Cunniscimu i nostri lochi à traversu i nostri sensi, è ci cunniscimu à traversu i nostri sensi.
 

Dapoi u XVIIIesimu in Europa, «u sughjettu» hè turnatu persona chì pensa, è fideghja da luntanu l’ogetti ch’ella vole studià, à pezzi frattagliati, è senza interazzione pussibule trà di elli. Hè nata tandu una visione di u mondu è di a Vita antrupucentrata, culunisatrice : una visione una, quella di l’unica pratesa, quella di l’omu dettu civilizatu.
Sta visione naturalista, currisponde à u mudernisimu in Europa. In antrupulugia oghje, si cerca à ragiunà al di là di sta spiccanza trà natura è cultura, è forse ancu trà a persona (fisica) è u so ingiru.

Oghje l’individuvu hà cusì pigliatu a suprana à nantu à un cullettivu chì in tempu di l’ecunumia agricupasturale per un dettu, si pinsava di più in cuntattu cù u so paese, è i so lochi. Hè cusì chì a neve era chjamata Bianchina, u ventu Macumeccu, a morte Falcina, a fame Mammapiera, Ciprianu u sonnu …  Eranu ànime vive quant’è l’umani, eranu paisani tutti quanti !
In Corsica ancu oghje, si dice chì l’Ochju u vi pudete piglià ancu da i Morti, è da certe anime in pena, perse à nantu à i so lochi ….
Oghje torna, in tempu di ragiunate glubalizate nate da u marcatu larghissimu di i servizii cum’è quellu di a medicina detta alternativa, a cuncipitura di a salute hè capace à cascà in la tràppula di generalisazione di un contr’à partitu naturalistu.
L’emuzione è e cridenze ch’elle portanu in senu, è chì si stampanu à mezu à a persona chì e tace, sicondu à e culture ùn appartenenu solu à a persona individualisata, ma ancu à un cullettivu (vicinatu, parenti, memorie è cridenze anziane...). Hè cusì ch’ella chjama una medicina chì pigliessi in contu al di là di a ragione individuale, l’ànime d’un cullettivu umanu è non umanu cù e so interazzione.
 

Ghjuvanni Carrara :
Serìa interessante di riflette à nantu à l’origine di l’antrupucentrisimu. Mi pare ch’ellu vene di e nostre cridenze. Ind’è a Bibbia, l’omu hè una criatura divina à mez’à una natura à u so serviziu. Pò tumbà è manghjà ciò ch’ellu li pare, senza primura.
E religione precristiane d’induve ci venenu ; l’Ochju, a Granitula, i Mazzeri è tante cridenze, piazzanu l’omu cumè fendu parte di a Natura.
Ritruvemu stu parè ind’è parechje isule, cum’è u Ghjappone cù a religione Shintō. Dicenu chì l’animali, e piante, e fureste, e petre, anu un spiritu quant’è l’omu. Per elli, a Natura hè un locu sacru sopr'à quellu l’omu ùn hà a suprana. Ghjè listessu in Islandia, credenu in un «populu piattatu» chi camperebbe in ogni lochi di l’isula.Trè isule, trè simule cridenze.

Pò esse chì a bellezza è a prisenza di l’ingiru face i populi è a rilazione cù a Natura. Ch’ella sia viulente ò appaciata, una sucietà ùn parturisce listess’omi. A saperanu i psicologichi chì trattenu omu è zitelli di paesi in guerra.
Più vicinu à noi, ciò chi i nostri, antenati, parenti, vicini, anu campatu ci tocca è tocc’à ghjente di tuttu u rughjone. L’ingiru, a sucietà, facenu a sucietà.
Ricevemu stimulazione sensoriale, suciale, culturale chì s’informanu di ciò chi hè u mondu è cumu omu si pò adattà.
Sarà què ch’ellu si chjama u « Sensorium ». Forse chì pè capì e gioie, e pene e suffranze d’una persona, ci vole à piglià in contu u so ingiru. In medicina si parla di « approche bio-psycho-sociale ».
 

Ghjacumina Acquaviva-Bosseur :
Curà una persona vale à curà a Vita ch’ellu porta in senu. U so ingiru suciale, u locu è i tempi (trà nascita è morte) ch’ellu campa, fermanu un spechju di l’intimità chì difinisce à u fora u so modu di sfruttà a robba ; trà a pruduzzione, u cunsummu è a gestione di i resti si sprime a manera ch’omu cuncipisce a lea intrattinuta cù a Salute, intesa da prusperità.
A Corsica hè sempre stata campata da i tramutimi parechji, ch’elli sianu isulani o ver’di u fora. Cusì u locu è u tempu, misuratu à partesi quelli percorsi, ùn si ponu spiccà,
E di listessa manera ind’è l’imaginariu cullettivu, anima è persona (corps) ùn si ponu spiccà, nè mancu vivi è morti sò liati à i lochi è à a memoria di i parcorsi soi.

Una limita spaziale hè campata à partesi di i parcorsi micca solu umani ma di quelli di le stelle, o di l’acqua : un ghjornu di viaghju è omu custruisce un pagliaghju, una baracca da u riposu. Una funtana indetta un locu da nutrisce si…
A parsona fisica porta sta lea cù u locu puru s’è oghje a scenza si ghjova da e tecnulugie muderne da fà un dianosticu « Curà si », currisponde nanzi tuttu à l’arte di sapè sente ciò ch’omu porta in senu.
Stà si à sente à mezu à un mondu chì valurizeghja per u più l’intermedia, a mediatisazione, i strumenti tecnulogichi novi di un naturalisimu chì spiccanu l’interiurità, da l’Esse fondu di a persona à prò di una medicina sempre più mecanizata.
Or, sta mecanisazione di a persona risponde à u mudellu standardizatu d’una medicina chì torna robba cummerciale.
Ci seria da chjamà una medicina capace à curà à tempu ghjente, lochi è pace di pettu à u tempu chì passa è spaventa à tanta ghjente. Si tratta d’una cuncipitura di a salute chì s’amparghi da chjuchi da respunsabilisà si di pettu à u rispettu di a Vita soia, quant’è quella di l’altri.